MASIGNASUKAv102
6510051498749449419

سوق العمل لمهندسين مدني

أضف تعليقا
الأحد، 6 مارس 2022

مهندس مدني حديث تخرج طبيعي تحس إنك تايه

سوق العمل لمهندسين مدني

كمهندس مدني حديث تخرج طبيعي تحس إنك تايه و مش عارف تتجه لأي مجال و أي تخصص بالظبط..! 
إحنا في البوست ده هنحاول نساعدك و نفهمك سوق العمل بالنسبة لمهندسين مدني بيكون عامل إزاي 

"إحتراماً لوقتك البوست هياخد منك حوالي 3 دقايق، حاول تركز في الكلام اللي جاي لأنه ممكن يختصر عليك وقت كبير و يكون سبب من أسباب نجاحك" 

إحنا كمهندسين مدني بيكون قدامنا أكتر من مجال و أكتر من تخصص نقدر نشتغل فيهم.. سواء في مصر أو في الخارج

المقصود بالمجالات هي: الخرسانات، التشطيبات، الـ Steel ، المساحة، الطرق، الشبكات و البنية التحتية، الكباري، الأنفاق، المنشآت المائية... إلخ


و المقصود بالتخصصات: التصميم، التنفيذ، المكتب الفني، إدارة المشروعات.. إلخ

لازم تكون عارف إن مافيش مهندس يقدر يشتغل في كل المجالات و التخصصات مع بعض.. إنت لازم تحدد هدفك الأول عشان تقدر تحدد طريقك صح. 

حاول في البداية تفكر إنت عاوز توصل لإيه.. نفسك تشتغل في أي مجال و أي تخصص عشان تقدر تبدأ أول خطوة في طريق مستقبلك صح.
لأنك لو مش محدد طريقك هتلاقي نفسك متخبط و كل فترة تسيب شغل و تروح شغل تاني و هتضيع وقت كبير بدون داعي.

خلينا متفقين إنك ممكن أصلاً ماتبقاش قادر تحدد إنت عاوز إيه لأنك مش عارف إيه المجالات و التخصصات اللي تناسبك أكتر و إيه الأفضل ليك مستقبلاً.

بالنسبة للمجال.. في مجالات منتشرة بشكل كبير و شغلها في كل مكان زي الخرسانات و الطرق.. حاول قدر إستطاعتك تكون ملم بمجال منهم على الأقل، و في مجالات شغلها بيكون محدود نسبياً زي الأنفاق و المنشآت المعدنية و لكن في نفس الوقت رواتبها بتكون عاليه و لو اتميزت فيها هتكون مختلف عن غيرك.
من الحاجات الكويسة إنك تتعلم مجال منتشر و شغله كتير زي الخرسانات و في نفس الوقت تكون ملم بمجال تاني جانبي زي الطرق أو الشبكات أو الأنفاق... إلخ، ده بيوفرلك حلول بديلة و بيقلل المخاطرة لو فكرت تسيب شغلك في أي وقت.
المجالات التخصصيه رواتبها بتكون أعلى و فرص شغلها أقل، و المجالات المنتشرة شغلها بيكون أكتر و رواتبها أقل.

لازم تكون فاهم كويس الفرق بين التخصصات المختلفة

  • التصميــــــــــم
و ده أكتر تخصص بندرسه في الكلية، التصميم هيكون مناسب ليك لو انت كنت بتحب مواد الاستراكشر و الخرسانة و الأساسات، و لو انت من المهندسين اللي بيحبوا يشتغلوا على البرامج الهندسية
عشان تكون مهندس تصميم إنشائي يفضل (و ليس شرط) إنك تختار مشروع تخرج خرسانة أو أساسات، و لازم تكون بتشتغل كويس على برامج AutoCAD, SAP, SAFE, ETABS, SP Column, Excel .
لو انت بتضايق من قعده المكتب لفترات طويلة يبقى شغل التصميم مش أنسب حاجة ليك.
لو إنتي مهندسة.. شغل التصميم ممكن يكون أنسب ليكي من شغل الموقع في أغلب الحالات.

  • التنفيــــــــذ
التنفيذ يعتبر من أهم التخصصات بالنسبة للمهندس المدني لأنه بيكون ليه النصيب الأكبر من عدد فرص العمل المتاحة، و لأن خبرة التنفيذ هتفيدك كمهندس مدني في أي تخصص تتجه ليه فحاول إنك تخلي شغل التنفيذ من المحطات الأساسية في طريقك.. و يفضل يكون أول شغل تشتغله بعد التخرج لأن تعلم التنفيذ هيفرق معاك كتير مستقبلاً.
شغل التنفيذ مناسب ليك لو إنت شخص اجتماعي و شخصيتك قياديه و بتعرف تتعامل مع الناس لأن شغل الموقع 50% منه فنيات هندسية و 50% مهارات إجتماعيه و إدارة.
لو إنت شخص طبعك خجول و هادي و مابتحبش تحتك بالناس.. يبقى التنفيذ مش أنسب شغل ليك.

  • المكتـــــب الفنـــــي
من أجمل التخصصات اللي ممكن تشتغلها.. و ده لأنه حلقة الربط بين كل التخصصات التانية، مهندس المكتب الفني هو المهندس الجوكر للمشروع اللي بيربط بين التصميم و التنفيذ و إدارة المشروعات، شغل المكتب الفني هو الحصر و المستخلصات و إعداد الـ Shop Drawings للمشروع.... إلخ


  • إدارةالمشروعـــــــــات
أعلى رواتب على الإطلاق لمهندسين مدني و يأتي على رأس قائمة تخصصات الهندسة المدنية، مهندسين إدارة المشروعات هم المسئولين عن البرامج الزمنية و التسعير و المطالبات الماليه و التكاليف و متابعه سير المشروع و العقود و العطاءات و المناقصات و دراسة المشاريع... إلخ
عشان تبقى تبقى مهندس إدارة مشروعات يفضل تكون عديت بمرحلة شغل الموقع و شغل المكتب الفني لأن الخطوتين دول هيساعدوك بشكل كبير في شغل إدارة المشروعات.
لو لسه طالب ممكن إختيارك لمشروع تخرج إدارة مشروعات يساعدك تبدأ في المجال
البرامج اللي ممكن تتعلمها و تساعدك في تخصصات إدارة المشروعات هي: Primavera, Navieswork, MS Project .
الكورسات اللي ممكن تفيدك: تنفيذ- مكتب فني- إدارة مشروعات- تسعير- PRMG
بعد تخرجك بـ3 سنوات على الأقل ممكن تمتحن و تطلع شهادة PMP


انت في رحلتك للبحث عن الوظيفة المناسبة هتقابل 3 شركات بشكل أساسي

1- مكاتب إستشارية
2- شركات مقاولات
3- شركات إستثمار

#المكاتب_الإستشاريه  تقدر تشتغل فيها تصميم أو إشراف على التنفيذ أو مكتب فني
#شركات_المقاولات  ممكن تشتغل فيها مهندس موقع أو مكتب فني أو إدارة مشروعات
#شركات_الإستثمار  دي الشركات المالكه للمشاريع ممكن تشتغل مهندس مندوب مالك، و دي ماننصحكش بيها في بداية حياتك العملية

يفضل لو هتشتغل موقع أو مكتب فني تبدأ بشركة مقاولات قبل المكتب الإستشاري

ممكن نشتغل في بعض المجالات و التخصصات الأخرى زي

الـ Pre Stressed Concrete - الـ BIM - الترميم و التدعيم- ضبط الجودة- السيفتي- مهندس تسويق.... إلخ

حاول برضه تحدد و تقرر إنت ناوي تشتغل في مصر ولا هتسافر، و لو بتفكر في السفر لازم تعرف السوق في الدولة اللي هتسافرلها شكله إيه و تفهم متطلباته و احتياجاته و تحاول تجهز نفسك.

أياً كان اختيارك للمجال و التخصص اللي ناوي تكمل فيهم، لازم تشتغل على نفسك كويس جداً بحيث تطور مهاراتك في المجال و التخصص اللي اخترتهم و تكون مهندس متميز عن غيرك عشان فرصتك في الحصول على وظيفة مميزة تكون أكتر