MASIGNASUKAv102
6510051498749449419

إزاي تبقى مهندس على وضعك

أضف تعليقا
السبت، 5 مارس 2022

 آخد كورسات إيه و إمتى و إزاي و فين

إزاي تبقى مهندس على وضعك

لو إنت طالب في هندسة قسم  مدني أو مهندس حديث تخرج غالباً هتبقى بتفكر آخد كورسات إيه و إمتى و إزاي و فين...؟ أطور نفسي إزاي..؟ أتعلم برامج إيه..؟ أنزل تدريب موقع إمتى..؟ أختار مشروع تخرج إيه..؟ إزاي أبقى مهندس شاطر بعد ما أتخرج..؟
أوقات كتير بنبقى محتاجين حد أكتر مننا خبرة في نفس مجالنا نستشيره و يساعدنا في إتخاذ القرارات اللي زي دي.. بيبقى نفسك حد يكتبلك روشتة أو وصفة تمشي عليها.
و عشان كدة إحنا كتبنا الـ Post ده، بس بلاش كالمعتاد تعمل Save Post بدون ماتقرا الكلام ده لأنه حرفياً ممكن يغير مستقبلك.. إقرا الأول و بعدين إعمل Save براحتك 😃

إنت في مرحلة الكلية بتتأسس و بتتعلم إزاي تفكر بشكل هندسي و بتاخد فكرة عن كل مجالات الهندسة المدنية بس لو إكتفيت باللي اتعلمته في الكلية فقط مش هتلاقي فرصة مناسبة بسوق العمل.. عشان كدة لازم تبقى عارف إزاي تطور نفسك و إيه بالظبط اللي محتاج تتعلمه و تتعلمه إزاي.

تعالى كدة واحدة واحدة نتكلم عن الخطوات اللي هتعملها في كل مرحلة عشان تبقى مهندس على وضعك:


• فترة الكلية مهم جداً إنك تركز على إنك (تفهم) المواد الأساسية المتعلقة بقسم مدني.. زي الإستراكشر و الخرسانة و الماتريال.. المواد دي مهم إنك تفهمها حتى لو ماجبتش فيها تقدير.. و حتى لو بتنقل شيتات.. بس ماتطلعش من الكلية غير و إنت (فاهم) لأنك لو طلعت من الكلية مش فاهم مش هيكون فيه فرق بينك و بين المقاول اللي بينفذ الشغل.

• إنت مش هتبدأ تفهم قسم مدني عبارة عن إيه غير و إنت في سنة تالتة و دي أهم سنة في الكلية مهم إنك تركز فيها.

• لازم تحدد هدفك الأول عشان تحدد طريقك.. يعني ماينفعش تبقى تايه و مش عارف إنت عاوز إيه و هتشتغل إيه، عود نفسك دايماً تفكر من الآخر للأول بمعنى إنك تقرر إنت ناوي تشتغل إيه بعد التخرج عشان تحدد إنت هتطور نفسك إزاي و هتمشي في أي طريق لأن تخصصات و مجالات الهندسة المدني كتير جداً و متشعبه و ماينفعش تبقى مش عارف إنت عاوز إيه.

• لازم الأول تعرف إيه الفرق بين المجال و التخصص.. المجال زي (الخرسانات، التشطيبات، الطرق، الـSteel ، المساحة، الهندسة الصحية...... إلخ) و التخصص زي (التصميم، التنفيذ، المكتب الفني، إدارة المشروعات)

• إنت بقى لما تتخرج غالباً هتشتغل في مجال واحد.. بس ممكن تشتغل في أكتر من تخصص.. يعني ممكن تشتغل مهندس تصميم و تنفيذ أو تنفيذ و مكتب فني أو مكتب فني و إدارة مشروعات.

• مهم بقى يا هندسة إنك تفكر و تحددد من دلوقتي إنت ناوي على إيه لأن بناءاً على القرار ده هتحدد إنت هتطور نفسك إزاي و هتتعلم برامج إيه و هتختار مشروع التخرج إيه.

• مش صح أبداً إنك كل ماتشوف إعلان كورس تروح تحضره عشان تطور نفسك.. ممكن يكون الكورس ده مش مناسب ليك أو الكورس مناسب بس التوقيت مش مناسب.. يفضل تحط Plan للكورسات اللي إنت محتاجها و التوقيت الأنسب لكل كورس.

• بلاش يبقى هدفك من الكورس هو الحصول على شهادة فقط.. لأن بإختصار شديد الشهادة اللي بتاخدها من الكورس مش هي اللي هتشغلك، المهم إنك تتعلم الحاجة و تبقى Qualified حتى لو مش معاك شهادة عشان كدة لازك تركز على إنك تفهم و تتعلم.

• لو إنت حابب تشتغل في التصميم يبقى يفضل تختار مشروع تخرج (خرسانة أو أساسات أو استراكشر) و هتحتاج تتعلم برامج ( AutoCad, Sap, Etabs, Safe, Csi col. ) و لازم تكون شاطر جداً في مواد الإستراكشر و الخرسانة، و تذاكر كود الأحمال و كود التصميم و دليل التفاصيل الإنشائية عشان دول هيبقوا أهم حاجة في شغلك.

• لو إنت حابب تشتغل في الطرق يبقى تركز في الكلية على مواد (الطرق و النقل و المرور و المساحة) و طبعاً تختار مشروع تخرجك (طرق أو مساحة) و هتحتاج تتعلم برامج (AutoCAD, Civil 3d ) و تذاكر كود الطرق.

• لو إنت حابب تشتغل في الـ Steel يبقى تختار مشروع تخرجك Steel طبعاً و هتحتاج تتعلم برامج ( AutoCad, Tekla ).

• لو إنت حابب تشتغل في التنفيذ مش هيفرق معاك كتير مشروع التخرج.. بس مهم إنك تركز على تدريب الموقع و تتابع كورسات و فيديوهات التنفيذ، و تحتفظ معاك بكتب المواصفات القياسية المصرية عشان تبقى مرجع ليك في التنفيذ ولازم طبعاً تتعلم أوتوكاد و إكسيل.

• لو إنت حابب تشتغل في المكتب الفني و إدارة المشروعات يفضل تختار مشروع تخرجك Management و هتحتاج تتعلم برامج (AutoCad, Excel, Primavera) بشكل أساسي و فيه برامج تانية ممكن تساعدك زي ( Revit, ASD ) و تركز على كورسات المكتب الفني و الإدارة.. و بعد التخرج ممكن تعمل دبلومة PRMG في الجامعة الأمريكية، و بعد 3 سنين من تخرجك تمتحن PMP عشان يبقى معاك شهادة دولية معترف بيها في إدارة المشروعات، و بالنسبة لشغل المكتب الفني و إدارة المشروعات يفضل تطور نفسك في الـ English عشان هتحتاجه كتير في شغلك.

• و انت في أولى مدني.. البرنامج الوحيد اللي ممكن تتعلمه هو الأوتوكاد.. أي برنامج تاني مش دلوقتي.

• بعد سنة تانية أنسب حاجة تعملها هي إنك تتعلم ساب و إكسيل فقط و ماتتعلمش أي برامج تانية دلوقتي.. و يفضل تبدأ تنزل تدريب موقع و تسجل كل حاجة بتشوفها و تصور صور للبنود و هي بتتنفذ و تحتفظ بيها معاك.. مش هتبقى فاهم كل اللي بتشوفه و لكن على الأقل هتبدأ تتعود على الموقع.

• برنامج الأوتوكاد و برنامج الإكسيل.. دول برنامجين أساسيين لكل مهندس في الدنيا.. ماينفعش تبقى مش عارفهم و مش شاطر فيهم لأنك هتحتاجهم أياً كان هتشتغل في أي مجال و أي تخصص.

• و إنت في سنة تالتة أو في الأجازة بين تالتة و رابعة دي أهم فترة لازم تستغلها كويس جداً.. لو إنت قررت تشتغل في التصميم أو تاخد مشروع تخرج ليه علاقة بالتصميم يبقى هتحتاج تتعلم برامج التصميم اللي قولنا عليها برامج ( AutoCad, Sap, Etabs, Safe, Csi col. ) و لو إنت قررت تاخد كورس أو دبلومة تصميم إنشائي يبقى ده أنسب وقت ليها.

• لو إنت قررت تشتغل في التنفيذ كمهندس موقع يبقى الأجازة بين تالتة و رابعة هي أنسب وقت تاخد فيه كورس التنفيذ بجانب تدريب الموقع و لو إنت قررت تشتغل في شغل المكتب الفني و إدارة المشروعات أو ناوي على مشروع Management يبقى أنسب وقت لكورسات المكتب الفني و البريمافيرا برضه هو بين تالتة و رابعة.

• يفضل كورس التنفيذ تحضره قبل كورس المكتب الفني و يفضل كورس المكتب الفني تحضره قبل كورس البريمافيرا.. ده مش شرط و لكن ده هيخليك تحقق إستفادة أكبر.

• لازم تكون عارف إن ماينفعش تشتغل مكتب فني إلا لو عندك فكرة عن التنفيذ و ماينفعش تشتغل إدارة مشروعات إلا لو عندك فكرة عن التنفيذ و المكتب الفني.

• للناس اللي مش عارفه أصلاً يعني إيه مكتب فني ده القسم المسئول عن (حصر الكميات و عمل المستخلصات و لوحات الشوب درووينج.... إلخ) و قسم إدارة المشروعات هو المسئول عن (التخطيط البرامج الزمنية و العقود و التسعير... إلخ).

• لو طموحك إنك تسافر تشتغل بره.. يبقى مهم بالنسبالك تتعلم برنامج Revit و تطور مهاراتك في اللغة.

• تأكد إن على قد ماتجتهد و تطور نفسك و مهاراتك على قد ماده هيفرق بشكل كبير في تحديد مستقبلك و مكانتك في الشغل بعد التخرج، و لو طموحك تبقى مهندس متميز.. حاول دايماً إنك تتعلم كل الـ Tools اللي ممكن تساعدك في الشغل.

• ممكن بعد تخرجك تتجه لشغل تاني خالص زي الـ Safety أو ضبط الجودة أو تبقى مهندس مبيعات أو تسويق... إلخ.

• فيه طلبة بيأجلوا كل كورساتهم لبعد التخرج علشان ماينسوش الكورسات دي.. و ده من أخطر الحاجات اللي ممكن تعملها لأنك بعد التخرج هتبقى إما بتستعد للشغل أو بتستعد للجيش و في الحالتين مش هيكون عندك وقت للكورسات، و عشان ماتنساش الكورسات اللي بتاخدها أثناء فترة الكلية لازم كل فترة تراجع عليها و بالأخص البرامج لأن أي برنامج مش هتشتغل عليه هتنساه.

• لو إنت من الناس اللي اتخرجت و لسه مش معاها أي كورسات أو برامج حاول تحدد مدة زمنية تخلص فيها كل الي عاوز تتعلمه أو على الأقل الحاجات الأساسية اللي مش هتعرف تشتغل من غيرها.